നിന്നെ മോഷ്ടിച്ചു

വായിച്ചു കേള്‍പ്പിക്കുന്നു

നിന്നെത്തന്നെ ഞാന്‍...


(13.12.2011)

വരിക്കച്ചക്ക നീ,
ചുള പറിച്ചതു ഞാന്‍
മുള്ളുകൊണ്ടതെനിക്ക്,
കൂട്ടാന്‍ വച്ചതും ഞാന്‍,
മുളഞ്ഞി പറ്റിയതുമെനിക്ക്,
വെന്തുവന്നപ്പഴറിഞ്ഞു...
ഗ്രഹണി നിനക്കല്ല,
എനിക്കാണെന്ന്...

(12.12.2011)

കണ്ടുമടുത്ത്‌
തമ്മില്‍ കശപിശയായ്‌
മൗസും കീബോര്‍ഡും...

(15.12.2011)

നീയെന്‍റെയെന്ന്
ഉമ്മവച്ചപ്പോള്‍ തൊട്ട്
നീയല്ലാതായ്‌ നീ...

(16.12.2011)

നീ തരാത്തത്
നിന്നില്‍ നിന്നെടുക്കുന്നു
വേണ്ടുവോളം ഞാന്‍

(16.12.2011)

ഹൃദയം പിഴിഞ്ഞുനോക്കി
തുള്ളി ബാക്കിയില്ല,
ഇനിയും തരാന്‍...

(26.11.2011)

ആളിക്കത്തി നീ
തീര്‍ന്നുപോലാല്‍പ്പിന്നെ
തീപ്പൊരിത്തരിയ്ക്കു ഞാ-
നെവിടെപ്പോകും...?

(28.11.2011)

അവളെക്കുറിച്ചുള്ള ഓര്‍മ്മയില്‍
ആഞ്ഞാഞ്ഞുവലിച്ച പുകയിലൂടെ
അവളെന്‍റെ കരളിലെത്തി

എന്‍റെ തൊലിയും രക്തവും
മലമൂത്രരേതസ്സുകളും
കറുത്തുപോയതങ്ങനെയാണ്...

(ആശയത്തിനു കടപ്പാട് : സുഹൃത്ത്‌)
(03.11.2011)

അനുവാദമില്ലാതെ
കണ്ണുകള്‍ കൊണ്ടെന്നെ
കുടിച്ചുതീര്‍ത്തില്ലേ നീ...
 

(09.12.2011)

തോന്നുമ്പം തോന്നുമ്പം
തോന്നുന്നതൊക്കെ പറയാനല്ലേല്‍
നിന്നെപ്പിന്നെന്തിനാ...?

(27.11.2011)

നിന്നെയെന്‍ നെഞ്ചില്‍
പണ്ടാരടക്കിയിട്ടും
പിടയ്ക്കുന്നോ നീ...?

(10.12.2011)

കൂട്ടുപോയത്
ഫെമിനിസ്റ്റ്‌ കാളയ്ക്ക്
എന്‍റെ ആണ്‍പശു...

(11.12.2011)

തൊട്ടാവാടി

കുരുന്നിലത്തുഞ്ചത്ത്
വിരലൊന്നു മുട്ടീപ്പോ
കുഴഞ്ഞുപോയില്ലേ നീ,
തൊട്ടാല്‍ക്കുഴഞ്ഞീ

(07.09.2011)

പലവട്ടം പറഞ്ഞില്ലേ,
പൂവുതരില്ലെന്ന്...
എന്നിട്ടുമെന്നിട്ടും
നീവന്നു പിന്നെയും
നോക്കിനില്‍ക്കുന്നത്
പൂവിനോ, എന്നെയോ?

(07..09..2011)

നാളെ മഴയാവുന്നത്
ഇന്നത്തെ കടല്‍

(07..09..2011)

ആത്മഹത്യ ചെയ്യേണ്ടത്
ശനിയാഴ്ച വൈകിട്ട്,
അടുത്ത ശനി വരെ
നീയൊന്നുമറിയില്ലല്ലോ...

(25.11.2011)

(സമര്‍പ്പണം :  

ശനികളില്‍ മാത്രം കണ്ടുമുട്ടുന്ന രണ്ടു കമിതാക്കള്‍ക്ക്)

മരിച്ച നിരപരാധിയ്ക്ക്
അപരാധികള്‍ ചേര്‍ന്ന് പണിയുന്നു
രക്തസാക്ഷി മണ്ഡപം,
നിരപരാധി മണ്ഡപം...

(24.11.2011)

മാമാങ്കം കണ്ടത്
അമ്മാത്ത് വച്ചാണ്;
ചെറിയ മാമനും വലിയ മാമനും തമ്മില്‍

(28.11.2011)

വലതുകൈ ചെയ്യുന്നത്
ഇടതുകൈയറിയാതിരിക്കാനാണ്
ഞാന്‍ കുടവയര്‍ വച്ചത്...

(30.11.2011)

എരിയലും പുകയലും
കൊള്ളിധര്‍മ്മങ്ങള്‍;
എരിയ്ക്കലും പുകയ്ക്കലും
നിന്‍റെ അധര്‍മ്മങ്ങള്‍

(04.11.2011)

അവളോട്‌ പറഞ്ഞ
വാക്കിന്‍റെ ഗര്‍ഭത്തില്‍
അര്‍ത്ഥങ്ങളുണ്ടായിരുന്നു;
ഇരട്ട പ്രസവിക്കാതിരിക്കാന്‍
അവളതലസിപ്പിച്ചു കളഞ്ഞു...

(04.11.2011)

തണുത്തു പൊള്ളിക്കാതെ
ഉരുകുകെന്‍ പ്രണയമേ...

ഉണ്ടെന്നു നീയും
ഇല്ലെന്നു ഞാനും
ഉണ്ടില്ലെന്നവനും
പറയുന്നതാണോ
വ്യതിരിക്തത...?

(22.11.2011)

പ്രണയം

വഷളാവുന്നതെപ്പോള്‍...???

- അതിനെ

' പ്റണയം ' എന്നെഴുതുമ്പോള്‍ മാത്രം.

(06.04.2011)

ഒരുമ്മ കൊടുത്തപ്പോള്‍

അവള്‍ അമ്മയായി,

ഇനിയൊരുമ്മ കൊടുക്കാന്‍

പേടിയാവുന്നു…

അവള്‍ തീര്‍ന്നുപോയാലോ…?

(01.04.2011)

പൊരുത്തം -

പത്തില്‍ പത്തെന്നവള്‍ 

പത്തിലെട്ടെന്നു പണിക്കര്‍ 
പത്തിലാറെന്നു കൂട്ടര്‍
പത്തില്‍ നാലെന്നമ്മ 
പത്തില്‍ രണ്ടെന്നു മക്കള്‍
പത്തിലൊന്നുമില്ലെന്നു കാലം...

(10.11.2010)

ആത്മഹത്യാക്കുറിപ്പ് -

" ഞാന്‍ മരിക്കില്ലായിരുന്നു,

ഒരു വാക്ക്,

ഒരേയൊരു വാക്ക്,

നീ പറഞ്ഞിരുന്നെങ്കില്‍,

'പോട്ടെടാ' എന്ന്... "

(26.03.2011)

മോഹങ്ങള്‍ മൂടിയ കുഴിയില്‍

ഞാനൊരു വാഴ നട്ടു

അടക്കാനാവാത്ത മോഹം

അതൊന്നു കുലച്ചു കാണാന്‍

(04.05.2011)

ഞാനത്

മുറിക്കാന്‍ തീരുമാനിച്ചു;

ഈര്‍ക്കില്‍ കൊണ്ട്

ഇലകള്‍ തുന്നി

നാണം മറച്ചപ്പോള്‍

നീണ്ടുനിന്നതുകൊണ്ട്.

  (14.04.2011)

ജീവിതം തളയ്ക്കപ്പെട്ട

വിലങ്ങിനും,

മൂന്നക്ഷരമായിരുന്നു,

നിന്‍റെ പേരിന്‍റെ. 

(12.04.2011)

മകരമഞ്ഞു മൂടുമ്പൊഴും

ഇടവപ്പാതി തിമിര്‍ക്കുമ്പൊഴും

എനിക്കു ഭയമാണ്,

നിനക്ക് പൊള്ളുന്നുവോ  എന്ന്,

ചൂടേറ്റ്, 

എന്റെ നെഞ്ചിലെ

നെരിപ്പോടിന്‍റെ...

(25.04.2011)

സ്നേഹം -- കിട്ടുന്നവര്‍ക്ക്

ദാഹം -- കിട്ടാത്തവര്‍ക്ക്,

ബാധ്യത -- വാരിക്കോരിക്കിട്ടി

ചെടിച്ചു പോയവര്‍ക്ക്...

(14.04.2011)

മനസ്സു പകുത്തപ്പോള്‍
കുറഞ്ഞുപോയത്
നിനക്കെന്നു ഞാനും
എനിക്കെന്നു നീയും

(20.10.2010)